Rizal – Pinaniniwalaang tumangging makipaghiwalay ang isang 58-anyos na mister kaya nagawang gilitan ng kanyang ka-live-in sa loob ng kanilang tahanan sa Sitio Gulod sa Barangay San Isidro, Rodriguez, Rizal kahapon ng umaga.
Bandang alas-5 ng umaga nang matagpuan ng mga barangay tanod ang bangkay ni Johnny Solina sa nabanggit na lugar habang pinaghahanap naman ang suspek na nakilalang si Teresita Reyes.
Sa imbestigasyon ng pulisya, lumalabas na bago naganap ang krimen ay namataan ng ilang residente na nag-aaway ang dalawa sa labas ng bahay tungkol sa pakikipaghiwalay ng babae sa lalaki.
Sa pag-aakalang away mag-asawa lang ang nagaganap ay ipinagwalang bahala ito ng mga kapitbahay at hindi nila alam na hahantong ang lahat sa malagim na krimen.
May teorya ang pulisya na nilambing muna ng babae ang kanyang mister saka isinagawa ang pamamaslang. Edwin Balasa