Limang hinihinalang miyembro ng isang carjacking/robbery-holdup gang ang napatay nang makipagbarilan sa mga elemento ng Task Force Limbas ng Philippine National Police-Traffic Management Group sa Molino, Bacoor, Cavite kahapon ng madaling-araw.
Kinilala ni PNP-TMG Director Chief Supt. Perfecto Palad ang mga napatay na suspek base sa nakuhang identification card sa mga ito na sina Anacleto Trinidad, residente ng Silang, Cavite; Arnold Causing ng Taguig City; Roberto Montano ng Upper Bicutan, Taguig City; Joaquin Seguen ng Tarlac City at isang hindi pa natukoy ang pagkakakilanlan.
Ayon kay Palad, sina Trinidad, Causing, Montano at isang ‘di nakilalang suspek ay pawang dead-on-the-spot sa engkuwentro habang si Sequen ay binawian naman ng buhay habang nilalapatan ng lunas sa Metro South Hospital.
Pasado alas-3:00 ng madaling-araw ng maispatan ng Task Force Limbas ang mga suspek na tumangging sumuko sa mga operatiba ng PNP-TMG sa bahagi pa lamang ng Alabang, Muntinlupa City kung saan nagkaroon ng habulan.
Ang mga suspek ay lulan ng puting Mitsubishi Lancer na unang kinarnap ng mga ito sa San Fernando, Pampanga noong Disyembre 5, 2006.
Nang makubkob ang mga suspek sa Daang Hari sa Molino, nagkabarilan ang magkabilang panig.
Bago ito, inihayag ng opisyal na dakong alas- 12:30 ng madaling-araw kahapon ay nakatanggap sila ng impormasyon na planong holdapin ng mga suspek ang isang 24 oras na convenient store sa Alabang.