Mister sinapian, misis kinatay

Pinaniniwalaang sinapian ng masamang espiritu ang isang 55-anyos na mister kaya nagawang pagtatagain hanggang sa mapatay ang kaniyang live-in-partner sa loob ng ka­nilang tahanan sa Purok Doña Josefa sa Ba­rangay Mabantao, Ka­palong, Davao del Norte kama­kalawa.

Halos lumaylay ang leeg at nagkaputul-putol ang katawan ng bikti­mang nakilala la­mang sa pangalang Ligaya habang sumuko naman sa pulisya ang suspek na si Ernesto Bata.

Sa ulat ng pulisya na nakarating sa Camp Crame, naganap ang bru­ tal na krimen pa­sado alas-9 ng gabi sa taha­nan ng magka-live-in part­ner sa  nasa­bing bayan.

Sa salaysay sa mga imbestigador ng anak ng suspek na si Alan, du­mating ang biktima sa kanilang tahanan at pa­sigaw na pinagsa­bihan ang suspek na batugan dahil palaging nakahi­lata at hindi nagtatra­baho.

Matapos makatulog ang biktima ay luma­bas ng bahay ang sus­pek at naupo sa ilalim ng pu­nongkahoy na animo’y may kinaka­usap sa di­lim.

Nang bumalik sa loob ng bahay ay nanli­lisik na ang mga mata nito at kinuha sa ta­guan ang bagong hasa at ma­talim nitong itak.

Napag-alamang na­patakbo palabas ng ka­nilang bahay si Alan ma­tapos na masaksi­hang pinagtataga ng ama ang biktimang hindi na nagi­sing sa pagkakatulog.

Humalakhak pa ang suspek na tila ikina­tuwa pa ang pagkama­tay ng biktima at nang mahi­mas­masan ay halos hindi makapani­walang napa­tay nito ang kani­yang live-in partner.

Inamin naman ng sus­pek sa pulisya na hindi niya alam ang gina­wa ng mga oras na pinas­lang nito ang biktima.