ORMOC CITY, Leyte – Kalaboso ang binagsakan ng isang matalinong tulak ng bawal na gamot makaraang masakote ng mga operatiba ng Regional Anti-Illegal Drugs Special Operation Task Force sa isinagawang buy-bust operation sa bisinidad ng Carlos Tan Street, Ormoc City, Leyte noong Huwebes ng hapon.
Ang suspek na nahaharap sa kasong paglabag sa RA. 9165 (Anti illegal Drugs Act of the Philippines) ay nakilalang si Fidel Bation y Rosal, 37, ng Barangay Dist. 25.
Ayon sa hepe ng RAIDSOTF na si P/Insp. Rio Tan, ang suspek ay nasakote rin at nakulong may ilang taon na ang nakalipas bago muling bumalik sa pagiging drug pusher.
Nasamsam sa suspek ang 4-plastic sachets ng shabu, P500 bill marked money, P550 na pinaniniwalaang koleksyon sa droga at isang Honda Wave 125 motorcycle (HQ-2170). (Roberto Dejon)