KIDAPAWAN CITY (Jan 4) – Patay ang isang guest relations officer habang pitong iba ang sugatan nang masabugan ng granada sa loob ng isang pubhouse sa Cotabato City kamakalawa ng gabi.
Kinilala ni Sr. Supt. Willy Dangane, hepe ng Cotabato City Police, ang nasawi na si Joan Dampas, 32, at nagtrabaho bilang GRO ng Fama Videoke House.
Sugatan rin ang anim na iba pang mga GRO na sina Rowena Tangkaan, Hazel Taiden, Paula Oliveros, Gina Tampudi, Juvy Retos, at Johanna Feura. Isa sa mga kustomer ng club na si Roberto Cabigas, empleyado ng Cotabato Light and Power Company, ay kabilang din sa mga sugatan.
Dalawa ang anggulong pinag-aaralan ng mga awtoridad kaugnay ng pagsabog. Posibleng extortion o personal na galit ang dahilan nito, ayon kay Dangane.
Batay sa testimonya ng gwardiya ng Fama pub house, tatlo sa mga regular na kostumer nila ang pumasok sa kanilang establisimyento at hinanap ang isang GRO. Pero ‘di nagtagal ang tatlo sa loob at nagmamadaling lumabas ng pub. Ilang minuto lang, narinig na nila ang isang malakas na pagsabog, ayon sa gwardiya.