CAMP AGUINALDO –Tatlo-katao ang naitalang nasawi samantalang aabot naman sa 300 sibilyan ang iniulat na naospital dahil sa epidemya ng diarrhea sa dalawang bayan ng Northern Samar, ayon sa ulat kahapon.
Kasabay nito, nagdeklara na rin ng state of calamity ang lokal na pamahalaan sa mga bayan ng Gamay at Lapinig matapos na umabot na sa daang katao ang apektado ng diarrhea outbreak. Sa ulat na tinanggap kahapon ng Office of Civil Defense, pinaniniwalaang kontaminado ang pinagkukunan ng inuming tubig ng mga residente kaya naapektuhan ang kanilang kalusugan.
Sa isang radio interview kay Gamay (dating Damya) Mayor Timoteo Capoquian ang pagdedeklara ng state of calamity ay mabibigyan ng pagkakataon ang mga lokal na opisyal na makakuha ng emergency funds para ipambili ng mga gamot na maipapamahagi sa mga apektadong bayan.
Kabilang sa naitalang namatay na residente ay dalawa sa bahay at isa naman sa ospital na pawang inaalam ang pagkikilanlan.
Ayon kay Capoquian, aabot sa 300 residente ang apektado ng diarrhea kung saan ay humingi na rin ng tulong sa mga doktor mula sa kanugnog na lungsod ng Catbalogan para makabili ng ‘intravenous fluids” sa Catarman, Samar.
Samantala, hindi na magkasya ang mga pasyenteng may diarrhea sa ilang lokal na hospital dahil umabot na sa 64 pasyente.
Kaugnay nito, nagpadala na kahapon ang Malacañang ng mga medical supplies at dextrose sa mga bayang tinamaan ng diarrhea sa Northern Samar
“Dinala ng helicopter ang mga dextrose and medical supplies para mapadali ang pagbibigay sa mga apektadong residente,”sabi ni Presidential Management Staff na si Cerge Remonde.
Napag-alaman ng Pangulo, ang diarrhea outbreak noong Biyernes ng gabi nang bumisita ito sa Eastern Visayas region.