BOCAUE, Bulacan — Muling lumubog sa tubig baha ang bayan sa Bulacan kaya’t napilitang ilikas ang may 50 pamilya kahapon ng umaga.
Sa ulat ng Provincial Disaster Coordinating Office, lumubog ang mga bayan ng Bocaue at Sta. Maria matapos na mapuno ang ilog ng Sta Maria na nagmula sa mga ilog sa Lungsod ng San Jose del Monte, Caloocan at Novaliches sa Quezon City.
Ipinaliwanag din ng PDCO na hindi sa Ipo Dam nagmula ang tubig na umapaw sa mga bayan ng Sta. Maria at Bocaue kaya natigil ang daloy ng trapiko sa mga lansangan.
Ang Ipo Dam na unti-unting nagpadaloy ng tubig na umagos sa Angat River ay may kabuuang 174 cubic meters per second ng i-angat nito ang dalawang flood gate ng .50 meters dahil umabot sa 101.50 meters ang water elevation sa nasabing dam.
Kaugnay nito, ilang bahagi ng MacArthur Highway sa Malolos City, Meycauayan at Marilao ang pansamatalang hindi nadaanan ng mabababang sasakyan kahapon tulad ng kotse dahil sa pagtaas ng tubig baha sanhi ng mga baradong kanal. Dino Balabo