BATANGAS — Isang Kano na retiradong airline designer ang pinagnakawan at pinagtulungang saksakin hanggang sa mapatay ng mga ’di-kilalang kalalakihang nanloob sa bahay ng biktima sa Barangay Bucana, Nasugbu, Batangas kamakalawa ng gabi.
Kinilala ni P/Senior Supt. David Quimio, Batangas police director, ang biktimang si Harold Adams, 96 at kasalukuyang naninirahan sa # 20 Maligaya Beach ng nabanggit na barangay.
Ayon sa ulat, bandang alas-9:45 ng gabi nang matagpuang patay ang biktima ng kanyang asawang si Nonalita Toledo-Adams sa loob ng kanilang master’s bedroom pagdating nito mula sa Maynila.
Isinugod pa sa Nasugbu Doctor’s Hospital ang biktima pero idineklara na itong dead-on-arrival ni Dr. Robert Rodriguez dahil sa dami ng tinamong saksak nito sa kanyang katawan. Umaabot naman sa halagang P.1milyon ari-arian at cash ang natangay ng mga magnanakaw habang inaalam pa ng mga awtoridad ang mga pagkakakilanlan. (Arnell Ozaeta)