CAMP CRAME — Bayolenteng krimen ang sinapit ng isang doktora matapos saksakin ay pinagbabaril ng ’di-kilalang lalaki sa harapan ng pinagsisilbihan nitong ospital sa Kabankalan City, Negros Occidental, ayon sa ulat kahapon.
Kinilala ng pulisya ang biktimang nasa kritikal na kalagayan na si Dr. Georgina Ofanda ng Gomersendo Garcia Memorial District Hospital sa Barangay 3 ng nabanggit na lungsod.
Base sa naantalang ulat, bandang alas-5 ng hapon noong Huwebes nang maganap ang krimen.
Napag-alamang tumatawid sa kalsada ang biktima nang lapitan at saksakin saka pagbabarilin ng nag-iisang ’di-kilalang lalaki.
Nadala pa sa nabanggit na ospital ang biktima, subalit inilipat din sa Bacolod Adventist’s Hospital sanhi ng maselang kalagayan.
Sinabi naman ni Kabankalan City Police Director, P/Supt. Calixto Mabugat, posibleng personal na alitan ang motibo ng krimen habang sinisilip rin ng mga imbestigador kung may kinalaman sa trabaho ng biktima. Joy Cantos