Inamin sa publiko ni Carolyn Carol Castañeda Jimenez, asawa ng pilantropo at dating Manila Congressman Mark “MJ” Jimenez na mabuting asawa ang huli.
Ayon kay Atty. Lorna Kapunan, sa kanilang pag-uusap ni Carol, inamin nito na wala siyang galit sa kanyang asawang si MJ, bagkus ay pinapurihan pa nito ang kanyang mister sa pagsasabi na mabuti itong asawa at tao.
Nauna rito, sinabi ni MJ na si Carol ay maayos pang nagpaalam sa kanya noong nakaraang Abril na pupunta lamang sa Shangrila pero hindi na ito umuwi hanggang sa lumantad sa publiko, kasama si Atty. Kapunan at kapatid ni Carol na si Rose Flaminiano at mga anak nito, at sinasabing malupit na mister si MJ.
Nang ipasuri si Carol kay Dr. Ronnie del Mundo, accredited physician ng Dangerous Drug Board, napatunayan umano na gumagamit siya ng droga kaya ipinagamot ito sa Silvercrest Rehabilitation Center ng kanyang asawa.
Ilang araw nang ginagamot si Carol sa rehabilitation center nang, noong Biyernes, sinalakay ito ng mga armadong tauhan ng Department of Justice at National Bureau of Investigation.
Ayon kay Diane Crespo, may ari ng Silvercrest Rehabilitation Center, sasampahan nila ng mga kasong kidnapping, abduction, trespassing at contempt of court ang lahat ng sangkot sa naganap na pagsalakay sa kanyang rehabilitation center at sa pagdukot sa kanyang tiyahin na si Carol.
Si Carol ay nasa pangangalaga ngayon ng grupo ni Atty. Kapunan at hindi nila ito inilalantad sa publiko.