Magsasaka dedo sa kuryente

PAGBILAO, Quezon — Umusok ang katawan at nagkikisay hanggang sa mamatay ang isang 54-anyos na magsasaka makaraang makuryente sa kinukumpuning tower ng National Transmission Commission (Transco) sa Barangay Silangan Malicboy sa bayan ng Pagbilao, Quezon kamakalawa. Ang biktimang napadikit sa talop na kable ng kuryenteng nakausli sa nabanggit na tower ay nakilalang si Purporio Oreto y Pornela. Ayon sa ulat ng pulisya, ang biktima ay lango sa alak ng maganap ang insidente. (Tony Sandoval)

Illegal recruiter nasakote

OLONGAPO CITY – Rehas na bakal ang kinasadlakan ng isang 42-anyos na lalaking illegal recruiter na pinaniniwalaang may mga nakabinbing kasong kriminal matapos na masakote ng mga tauhan ng Criminal Investigation and Detection Group-Zambales sa isinagawang operasyon sa Subic Bay Freeport Zone kamakalawa ng hapon. Sa bisa ng warrant of arrest na inisyu ni Judge Alipio Flores ng Vigan, Ilocos Sur Regional Trial Court Branch 20 sa kasong large scale estafa na walang piyansa, inaresto ang suspek na si Nestor Ruiz ng Barangay Rizal, San Antonio, Zambales. Ang suspek ay naaktuhan ng mga tauhan ni P/Supt. Rene Ong na nakikipagnegosasyon sa dalawa na namang biktima. (Jeff Tombado)

Editor binoga ng brodkaster

CAMP CRAME — Binaril at nasugatan ang isang 53-anyos na dating editor ng lokal na pahayagang Visayan Tribune ng sariling tiyuhing broadcaster sa naganap na karahasan sa Iloilo City, kamakalawa. Kinilala ang biktima na si Napoleon Nava ng Brgy. Banguit, Cabatuan na naisugod sa Western Visayas Medical Center dahil sa tama ng bala sa kaliwang hita. Hindi malinaw sa ulat kung nasakote ang suspek na si Sumakwel Nava ng Aksyon Radyo at co-host sa programang "Reklamo sa Publiko." Napag-alamang nagkita ang dalawa sa opisina ni Rolan Causing sa ilalim ni Gov. Niel Tupas. Sa hindi maipaliwanag na dahilan ay naganap ang pamamaril. (Joy Cantos)