CAMP CRAME – Isa na namang opisyal ng militanteng grupo ang pinaslang ng mga armadong kalalakihan sa Barangay Canlubad sa bayan ng Danao, Bohol kahapon ng umaga. Nagtamo ng maraming tama ng bala ng baril sa katawan ang biktimang si Victor Olaiver na tumatayong provincial chairman ng Bayan Muna at Hukbong Magsasaka ng Bohol. Sa ulat ni P/Chief Supt. Silverio Afarcio, police regional director, ang biktima ay lulan ng habal-habal na minamaneho ni Joselito Ayab nang tambangan pagsapit sa Caban Bridge patungo sana sa Tagbilaran City mula sa Barangay San Carlos. (Joy Cantos) Show comments
|
Mag-asawang trader pinaslang
PULILAN, Bulacan – Tinambangan at napatay ang mag-asawang trader ng mga hindi kilalang lalaki habang ang dalawa ay sakay ng owner-type jeep at bumabagtas sa kahabaan ng Barangay Tabon, Pulilan, Bulacan kahapon ng umaga. Apat na bala ng baril sa katawan ang tumapos kay Barangay kagawad Roberto Victoria, 42, samantalang si Shierley, 40 ay tinamaan sa ulo at likurang bahagi. Sa inisyal na imbestigasyon, ang mag-asawa na residente ng Barangay Dulong Malabon ay lulan ng jeep (CJF-989) patungo sa palengke ng Pulilan upang magbukas ng kanilang tindahan nang harangin ng mga armadong kalalakihan bago isagawa ang pamamaslang. Patuloy naman ang pagsisiyasat sa karahasang naganap. (Dino Balabo)