P.75-M alahas nalimas sa pawnshop

CAMP SIMEON OLA, Legazpi City – Aabot sa P.75 milyong mamahaling alahas ang nilimas ng mga hindi nakikilalang kalalakihan makaraang looban ang isang pawnshop sa Purok 2, Barangay South Poblacion sa bayan ng Jose Panganiban, Camarines Norte, kamakalawa. Base sa ulat ng pulisya, nagawang wasakin ang likurang bahagi ng bahay-sanglaan na pag-aari ni Oscar Fulong. Winasak din ang vault ng pawnshop na kinalalagyan ng mga alahas na pinaniniwalaang sangla ng ilang residente. Narekober ng pulisya sa crime scene ang mga gamit ng magnanakaw para malimas ang mga alahas. May teorya ang pulisya na hindi pa nakakalayo sa nabanggit na bayan ang mga kawatan na ngayon ay pakay ng pulisya. (Ed Casulla)