Negosyador ng jueteng itinumba

BULACAN – Pinagbabaril hanggang sa mapatay ang isang 66-anyos na lalaki ng mga hindi kilalang armadong kalalakihan habang ang biktima ay nagmamaneho ng sasakyan sa kahabaan ng Cagayan Valley Road na sakop ng Barangay Sta. Rita, Guiguinto, Bulacan kamakalawa ng gabi. Idineklarang patay sa pinagdalhang ospital ang biktimang si Gaudencio "Ka Totoy" Estrella ng Barangay Pulong Gubat, Balagtas, Bulacan samantalang nakaligtas naman ang kasama ng biktima na si Alma Dillomas, 37, trader at naninirahan sa Barangay Tiaong. Base sa ulat ng pulisya, naitala ang insidente dakong alas-9 ng gabi matapos na harangin ng mga killer na naka-motorsiklo ang Mitsubishi Adventure (CTE-702). Wala pang malinaw na motibo ang nasisilip ng pulisya, pero posibleng may kaugnayan sa trabaho ng biktima ang naganap na krimen. (Ulat ni Efren Alcantara)