2 sibilyan tinodas ng NPA

CAMP SIMEON OLA, Legaspi City – Dalawang sibilyan kabilang na ang isang tiktik ng militar at pulisya ang niratrat ng mga rebeldeng New People’s Army (NPA) habang ang mga biktima ay naghihintay ng masasakyan sa Barangay Mayngaway, San Andres, Catanduanes kahapon ng umaga. Agad na binawian ng buhay si Oscar Monjardin, 51, mangingisda at pinaghinalaang tiktik ng pamahalaan, samantalang ang biktimang si Lydia Balobar, 35 ay tinamaan ng ligaw na bala ng baril dahil katabi lamang ni Oscar. Nakilala naman ng ilang saksi sa krimen ang isa sa mga suspek na si Miguel Samonte. Kaagad naman tumakas ng mga rebelde patungo sa Barangay San Isidro. (Ulat ni Ed Casulla)