Ang biktima ay kinilalang si John Nash Axalan Gayano, 6-anyos, residente ng Block 3, Lot 11, Carnation St., Bacoor ng nasabing lalawigan.
Agad namang nasakote ang isa sa mga suspek na si Bernabe Turano, 38, residente ng Block 14, Lot 12, Masayahin St. ng nasabi ring lugar. Pinaghahanap naman ng pulisya ang apat pa sa mga suspek na nakilalang sina Manolo Axalan, Cecilia Aguilar, Abet Turano at Manny Axalan, ng Cabuyao, Laguna at pawang mga kamag-anak ng biktima.
Nabatid na ang pagdukot sa biktima ay naganap dakong alas-10 ng umaga sa loob mismo ng tahanan nito nang pasukin ng mga suspek ang kanilang tahanan at puwersahan itong isakay sa isang Besta Van na may plakang DWX -447 na mabilis na tumakas patungo sa hindi pa malamang destinasyon.
Ayon sa pulisya hindi naman masasabing isang kaso ng kidnap-for-ransom (KFR) ang pagdukot sa biktima dahilan pawang kamag-anak nito ang mga suspek.
Lumilitaw na may personal na alitan ang mga suspek at ang mga magulang ng bata na nasa pangangalaga ng kaniyang ama dahilan nasa Singapore ang kanyang ina. Iniimbestigahan pa ang kaso. (Ulat ni Cristina G. Timbang)