Sa ulat na isinumite kay Police Chief Supt. Jaime Lasar, Bicol provincial director, bandang alas-10:30 ng umaga ng unang nasunog ang Camagong Elementary School sa Barangay Camagong Oas, Albay.
Tinupok ng apoy ang tatlong silid-aralan bago pa maapula ang sunog na tumagal ng isang oras.
Kasunod nito ay nasunog naman ang Malabog National High School sa Barangay Malabog, Daraga dakong alas-11:45 ng umaga. Limang silid-aralan naman ang nilamon ng apoy bago pa maapula.
Napag-alaman pa na tatlong oras matapos na maapula ang sunog sa Barangay Malabog ay tinupok naman ng apoy ang Albay Central School sa Legaspi City na ikinawasak ng limang silid-aralan at bahagyang nasira ang dalawa pa.
Wala naman iniulat na nasawi o nasugatan sa naganap na tatlong sunog at kasalukuyang pang sinisiyasat ang pinagmulan ng apoy na tumupok sa tatlong eskuwelahan. (Ulat ni Ed Casulla)