Binawian ng buhay habang isinusugod sa pagamutan ang biktimang si John Jewel Acol at nasugatan naman ang driver ng bus na si Edgardo Magadia matapos na tamaan ng bala ng shotgun na pinaputok ng dalawang holdaper.
Kabilang pa sa nasugatan ay ang dalawang holdaper na naaresto, na nakilalang sina Marlon Sediño at Ramil Clamor, kapwa residente ng Brgy. Morong, Sariaya na kasalukuyan ngayong ginagamot sa Nursery Community Hospital sa karatig-bayan ng Candelaria.
Nakilala naman ang nakabarilan ng dalawang holdaper na si Jail Officer 3 Edgardo Bautista, nakatalaga sa San Pedro Municipal Jail sa Laguna na kabilang sa mga pasahero ng hinoldap na South Star bus, may plakang DWY-716.
Base sa imbestigasyon, dakong 9:40 ng gabi habang bumabagtas ang bus sa kahabaan ng national highway na sakop ng Brgy. Sto. Cristo, Sariaya nang magdeklara ng holdap ang dalawa.
Habang nililimas ang pera, alahas at mga kagamitan ng mga pasahero ay di na nag-aksaya ng pagkakataon si Bautista na nagkataong lulan ng bus at pinaputukan ang dalawa na kapwa tinamaan.
Dahil sa pagkabulilyaso ng kanilang delihensya ay nagpaputok din ang dalawang holdaper at tinamaan ang bata at driver ng bus.
Nadakip naman ang mga suspek ng mga nagrespondeng pulisya na nagdala sa mga ito sa pagamutan. (Ulat ni Joy Cantos)