Isa sa apat na holdaper ang napatay ay nakilalang si Salvador Salceda ng Lilac St., Fairview, Quezon City at ang pasaherong tinamaan ng ligaw na bala ng baril ay si Bernardo Capinpin.
Samantala, ang dalawang pasahero ng pampasaherong bus na tinamaan din ng ligaw na bala ng baril ay nakilalang sina Mario Samson, 34 ng Brgy. Banga, Plaridel at Reynaldo Lacuna, 22 ng Brgy. Masuso, Guiguinto, Bulacan.
Kinukunan naman ng salaysay ang nakipagbarilang pulis na si PO2 Celestino Cruz, Jr., isang miyembro ng PNP-Special Action Force na nakatalaga sa Senado.
Sa ulat na nakarating kahapon kay P/Sr. Supt. Edgar Acuña, Bulacan PNP provincial director, nagdeklara ng holdap ang apat na nagpanggap na mga pasahero sa Baliuag Transit Bus (CVN-781) habang patungo sa Guiguinto sa harap ng isang gasolinahan.
Habang nililimas ng mga holdaper ang mga suot na alahas at pera ng 60 pasahero ay biglang tumindig at nagpakilalang pulis si Cruz kaya nagbunot naman ng patalim si Salceda ngunit kaagad naman pinaputukan at napatay.
Bandang alas-9:30 ng gabi nang makipagbarilan si Cruz sa natitira pang holdaper hanggang sa tamaan ng ligaw na bala ang dalawa pang pasahero ngunit biglang naglaho sa dilim ang tatlo. (Ulat nina Efren Alcantara/Rudy Andal)