4 na alkalde ng Abra inalis sa hit list ng NPA rebels

BAGUIO CITY – Apat sa limang alkalde mula sa lalawigan ng Abra na naunang napaulat na itutumba ng mga rebeldeng New People’s Army (NPA) ang kumpirmadong inalis na sa listahan bilang target at isa na lamang ang nakaambang nikidahin anumang araw.

Sa nilagdaang statement ni Diego Wadangan na may petsang Marso 5, 2002, lumalabas na si Bucloc, Abra Mayor Mailed Molina ang kanilang target na itumba dahil sa kasalanang ginawa nito sa kanilang kilusan at taumbayan.

Si Wadangan na kasapi sa Abra-based Agustin Begnalen Command ng NPA rebels ay pinaniniwalaan din na responsable sa pagpatay kay ex-priest Conrado Balweg noong Dec. 31, 1999.

Mula sa kangaroo court (peoples court), napatunayang nagkasala si Mayor Molina ng kasong treason laban sa kilusan kabilang na ang pagpatay sa mga sibilyan, red-fighters at land-grabbing.

Gayunman, inalis sa listahan ng liquidation squad ng NPA sina San Isidro Mayor Elizalde Pacsa, La Paz Mayor Mark Ysrael Bernos, Lagayan Mayor Cecille Luna at San Juna Mayor Miguel Taverner na unang iniulat na itutumba. (Ulat ni Artemio Dumlao)