2 katao tiklo sa pagpupuslit ng alak

SUBIC BAY FREEPORT – Dalawa katao na pinaniniwalaang miyembro ng sindikato na kasangkot sa pagbebenta ng mga imported goods na binili sa duty free shops dito ang naaresto ng mga tauhan ng law enforcement department ng Subic Bay Metropolitan Authority (SBMA) kahapon.

Kinilala ng pulisya ang mga naarestong suspek na sina Jonathan Miranda, ng 93 14th St., New Kalalake at Grace Calma, ng 45 Natividad Street, Pag-Asa, kapwa sa lungsod na ito. Nasamsam sa dalawa ang 24 kahon na naglalaman ng 126 bote ng imported na Fundador at 48 bote ng Absolute Vodka na nagkakahalaga ng P86,700.00.

Ayon kay SBMA Intelligence and Investigation Office (IIO) Spcial Investigator Paquito Torres, ang mga suspek na sakay ng isang asul na Toyota Hi-Ace (NMA 173) ay inaresto makaraang madiskubre ni Officer Regin Arandia ang mga alak sa loob ng van. (Ulat ni Jeff Tombado)