OKLAHOMA CITY — Kumolekta si Shai Gilgeous-Alexander ng 29 points, 9 rebounds at 9 assists para banderahan ang top-seeded Thunder sa 117-95 demolisyon sa Dallas Mavericks sa Game One ng kanilang Western Conference semifinal series.
Tumipa si Gilgeous-Alexander ng 8-of-19 field goal shooting at 11-of-13 clip sa free throw line para sa 1-0 lead ng Oklahoma City sa kanilang best-of-seven series ng Dallas.
Humakot si Chet Holmgren ng 19 points, 7 rebounds at 3 blocks habang may 18 markers si Jalen Williams para sa Thunder na kinuha ang 111-89 bentahe sa huling 3:36 minuto ng fourth period.
Tumapos si Luka Doncic na may 19 points mula sa masamang 6-for-19 field goal shooting sa panig ng Mavericks na nakahugot kay Kyrie Irving ng 20 points.
Naglista si center Daniel Gafford ng 16 points, 11 rebounds at 5 blocks.
Sa Boston, kumamada si Jaylen Brown ng 32 points para sa 120-95 pagbugbog ng Celtics sa Cleveland Cavaliers sa Game One ng kanilang Eastern Conference semifinals duel.
Nagsalpak si Derrick White ng pitong 3-pointers at tumapos na may 25 markers para sa Boston na nakakuha kay Jayson Tatum ng 18 points at 11 rebounds.