MANILA, Philippines — Iaalay ng Choco Mucho sa kanilang tatlong injured teammates ang paghahamon sa nagdedepensang Creamline sa 2024 Premier Volleyball League All-Filipino Conference Finals.
Ito ang pahayag ng mga Flying Titans sa pagsagupa sa Cool Smashers sa best-of-three championship series na magsisimula bukas sa Smart Araneta Coliseum.
“May mga hugot kami. Kasi marami kaming teammates na down. Tatlo sila this conference,” ani middle blocker Maddie Madayag kina Des Cheng, Aduke Ogunsanya at Kat Tolentino.
Nagkaroon si Cheng ng ACL tear sa kanyang kanang tuhod noong 2023 Second All-Filipino Conference habang nakalasap si Ogunsanya ng isa ring ACL injury sa kaliwang tuhod sa pagsisimula ng torneo kontra sa Nxled.
May auditory condition naman si Tolentino sa gitna ng elimination round.
Sa kabila ng injury ng tatlo ay nagawa pa rin ng Choco Mucho na makapasok sa PVL Finals hangad ang kanilang kauna-unahang korona.
“It’s always against our odds. Always kong sinasabi na resilient ang Choco Mucho. Kahit anong gawin mo, suntukin n’yo kami, bugbugin n’yo kami, babangon at babangon kami,” pahayag ni Madayag.
“Iyon ang dadalhin namin sa Finals na kahit anong mangyari lalaban at lalaban kami,” dagdag ng 26-anyos na two-time UAAP champion para sa Ateneo Lady Eagles.
Tinalo ng Flying Titans ang Cool Smashers, 13-25, 19-25, 25-21, 25-20, 18-16, sa pagsisimula ng single-round robin semifinals na tumapos sa kanilang 0-12 head-to-head record.