BULAN, Sorsogon, Philippines — Bulagta ang isa sa mga sundalo ng Philippine Army matapos patraydor na tambangan ng mga hinihinalang kasapi ng New People’s Army (NPA) sa barangay road ng Brgy. Calpi, dito sa bayang ito, kamakalawa ng umaga.
Napuruhan ng punglo sa katawan at agad nasawi ang biktima na kinilalang si Cpl. Rodel Felismino, kasapi ng 49th Infantry Brigade ng 9th Infantry Division, ng Philippine Army.
Sa ulat, kasama ang ilang kapwa sundalo sakay ng kanilang motorsiklo at binabagtas ang kahabaan ng kalsada ng naturang barangay kung saan nagkakaroon sila ng community support program nang pagbabarilin nang walang kalaban-laban ng mga nakaabang na mga komunista.
Hindi umano nakapanlaban ang mga sundalo dahil hindi sila naka-combat mode kaugnay ng ginagawang mga programa at pagtulong sa mga residente ng naturang barangay kaya hindi inaasahang tatargetin sila ng mga NPA.
Mahigpit na binatikos ng liderato ng 9th Infantry Division sa pangunguna ni Major General Noe Alberto Peñafiel ang ginawang patraydor na pang-aatake ng mga komunista sa kanyang mga tauhan na ikinasawi ni Cpl. Felismino at nangakong hindi titigil ang mga kasundalohan sa misyong protektahan ang seguridad at kalayaan ng mga mamamayang Bicolano.