COTABATO CITY, Philippines — Arestado ang isang pulis matapos magbenta ng dalawang M16 assault rifles sa mga kapwa pulis sa isang entrapment operation sa Barangay Rosary Heights 13 dito sa lungsod nitong Miyerkules.
Sa ulat kahapon ni Police Lt. Col. Ariel Huesca, regional chief ng Criminal Investigation and Detection Group-Bangsamoro Autonomous Region, nasa kustodiya na nila ang suspect na pulis na may ranggong Master Sergeant na kasapi ng Sultan Kudarat Municipal Police Station.
Nakumpiska ng CIDG-BAR agents mula sa suspek pulis ang dalawang M16 assault rifles at mga bala na kanyang ibinenta sa kanila sa halagang P160,000.
Ayon kay Huesca, ang suspect, hindi muna pinangalanan ang naarestong pulis dahil inaalam pa kung sinu-sino ang kanyang mga kasabwat.