ZAMBOANGA CITY, Philippines — Isang drug courier ang naaresto ng pinagsanib na puwersa ng Philippine Drug Enforcement Agency (PDEA) at pulisya at nasamsam ang nasa P6.8-milyon shabu sa isang entrapment operation sa lunsod na ito, kahapon.
Kinilala ang naarestong suspek na si Akino Damming Muharram, 24, tubong Talipao, Sulu ng PDEA-9 narcotics agents at police personnel mula sa Regional Drug Enforcement Unit 9 (RDEU) sa buy-bust operation, pasado ala-1:00 ng hapon sa bisinidad ng gas station sa kahabaan ng Gov. Camins Avenue.
Nakatakas naman ang dalawang kasama ni Muharram matapos na maramdam na ang kanilang ka-deal ay mga otoridad.
Narekober mula sa suspek ang isang kilo ng shabu na nakabalot sa vacuum-sealed plastic pack, na kulay pula na Taiwanese tea foil pack may tatak na “Da Hong Tea”, 9 bundles ng boodle money na tig-1,000 genuine bill marked money, at cellphone unit.