MANILA, Philippines — Dahil sa ginawang pagbubugbog makaraang umuwing lasing, patay ang isang mister nang tadtarin ng saksak ng kanyang kinakasama sa loob ng kanilang tahanan sa Tanay, Rizal, ayon sa ulat ng pulisya kahapon.
Naisugod pa sa Margarito Duavit Memorial Hospital ang biktimang si Ryan Lozano, 29, tricycle driver at residente ng Kabilang Ibayo, Brgy. Wawa, Tanay, ngunit binawian din ng buhay bunsod ng mga tama ng saksak sa iba’t ibang bahagi ng katawan.
Arestado naman ang suspek na kinilala lang sa alyas na “Mary”, 29-anyos, at mahaharap sa kasong homicide sa piskalya.
Batay sa ulat ng Tanay Municipal Police, alas-8:00 ng gabi ng Linggo nang maganap ang krimen sa loob ng tahanan ng mag-live-in partner ngunit kamakalawa lamang ito iniulat sa kanilang tanggapan.
Lumilitaw sa imbestigasyon na bago ang krimen ay umuwi umano sa kanilang bahay ang biktima nang lasing at sa ‘di pa batid na kadahilanan ay binugbog ang kanyang kinakasama.
Hindi naman ito pinalampas ng babae at nang makahanap ng pagkakataon ay kaagad na kumuha ng patalim at walang habas na pinagsasaksak ang kanyang “mister” na nagresulta sa agaran nitong kamatayan.