MANILA, Philippines — Patay ang isang babae nang pagsasaksakin ng isang lalaki na sinasabing matagal na umanong kaalitan ng kanilang pamilya sa Rodriguez, Rizal kamakalawa ng gabi.
Naisugod pa sa Ynares Medical Center ang biktimang si Manilyn Bio, ng Brgy. Burgos, Rodriguez ngunit idineklara na ring patay ng mga doktor.
Nakatakas at tinutugis na ng mga otoridad ang suspek na kinilala lang na si alyas ‘Roberto.’
Sa ulat ng Rodriguez Municipal Police Station na dakong alas-10:00 ng gabi nang maganap ang krimen sa Dela Costa Subdivision sa Brgy. Burgos.
Naglalakad lamang sa lugar ang biktima at kanyang mga kasama pauwi ng kanilang tahanan, nang bigla na lang lapitan ng suspek at ilang ulit na pinagsasaksak.
Nang matiyak na napuruhan ang biktima, mabilis nang tumakas ang suspek patungo sa Brgy. San Jose.
Kaagad namang isinugod ng kanyang mga kasamahan sa pagamutan ang biktima ngunit dead on arrival na ito.
Sa imbestigasyon ng pulisya, natukoy na matagal nang may alitan ang suspek at pamilya ng biktima na isa sa mga motibong tinututukan sa krimen.