CAVITE, Philippines — Pinagsasaksak hanggang sa mapatay ng isang lalaki ang 40-anyos na mister sa loob ng pinapasukang warehouse kahapon ng madaling araw sa Brgy. Toclong, bayan ng Kawit, dito.
Kinilala ang biktima na si Ronald Dangan, 40-anyos, may asawa, residente ng Baclaran, Parañaque City dahil sa tinamong maraming saksak sa iba’t ibang bahagi ng katawan.
Naaresto naman ng duty security guard ng warehouse ang suspek na nakilalang si Ronald Aquiman, 33 anyos, residente ng Brgy. Toclong, Kawit, Cavite.
Sa ulat mula kay Police Major Rommel Carcellar, hepe ng pulisya sa bayang ito, ala-1:07 ng madaling araw nang maganap ang insidente sa loob ng Brawer Builders Warehouse sa nasabing lugar kung saan nagkasagutan ang dalawa na nauwi sa suntukan hanggang sa pagsasaksakin ng suspek ang biktima.
Agad na rumesponde ang guwardyang si Rannie Boy Mindaña, 21-anyos at dinakip ang suspek, saka agad dinala sa pulisya. Naitakbo naman sa San Pedro Calungsod Medical Center ang biktima subalit idineklara nang dead-on-arrival.
Narekober sa suspek ang patalim na ginamit nito sa pagpatay sa biktima.