ROMBLON, Philippines (Romblon News Network) — Inaprubahanan na ng Sangguniang Panlalawigan ang ordinansa ng Sangguniang Bayan ng San Jose na magbabawal sa pagtitinda ng debote na mga gasulina o patingi-tingi lamang sa mga tindahan na matatagpuan sa bayan.
Ayon sa San Jose Public Information Office, multang hanggang P2,500 ang kakaharapan ng sinuman na mahuhuli na lalabag sa nasabing patakaran.
Inatasan na ng lokal na pamahalaan ang Bureau of Fire Protection, Philippine National Police, at mga barangay officials na kumpiskahin ang lahat ng gasulina na mahuhuli nila ibinebenta sa bote-bote at iba pang kahalintulad na lagayan.
Ang ordinansang ito ay naipasa ng Sangguniang Bayan ng San Jose noon pang Nobyembre nang nakaraang taon.
Ang pagbabawal sa pagbebenta ng gasulina na nakalagay sa soda bottles, plastic bottles, jugs, at iba pang kahalintulad na lagayan ay nakasaad sa Department of Energy (DOE) Circular No. DC2003-11-010.
Sinabi na noon ng DOE na ang pagbebenta sa bote-bote ng gasulina ay hindi ligtas at wala rin umanong permit mula sa Bureau of Fire Protection at sa lokal na pamahalaan.
--
Romblon News Network is a regional partner of Philstar.com.