MANILA, Philippines — Isang lalaki ang nasawi nang malibing nang buhay sa naganap na landslide kahapon ng umaga sa Sitio Boga, Barangay Monamon Sur, Bauko, Mountain Province.
Idineklarang dead on arrival sa ospital ang biktima na si Andres Sagayo, 58, ng Sitio Pactil, Barangay Monamon Sur.
Batay sa ulat ng Bauko Municipal Disaster Risk Reduction and Management Office, kasalukuyang nasa lamayan ang biktima kasama ang kanyang pamilya sa nasawing kaanak nang biglang magkaroon ng pagguho ng lupa na tumabon sa biktima.
Mabilis na nagsagawa ng rescue at retrieval operation at nang makuha ang katawan ni Sagayo ay agad itong dinala sa Lutheran Hospital sa Abatan, Buguias, Benguet, subalit idineklarang dead on arrival.
Nagbabala ang mga otoridad sa mga motorista na maging maingat sa mga kalsada dahil sa posibleng mga landslides dahil sa naganap na lindol sa Luzon noong Miyerkules ng umaga.