SORSOGON CITY, Sorsogon , Philippines — Bulagta ang isa sa tatlong suspek na inireklamo ng pangongotong matapos na makipagbarilan umano sa mga pulis sa Brgy. Sawanga, Bacon District ng lungsod na ito kamakalawa ng hapon.
Napuruhan ng punglo sa iba’t ibang bahagi ng katawan at agarang nasawi ang suspek na kinilalang si Joerez Ditan Dichoso, residente ng Brgy. San Rafael, Prieto Diaz.
Sa ulat, dakong ala-1:45 ng hapon, tumawag ang ilang residente ng Brgy. Bato dahil umano sa pananakot at pangingikil na ginagawa ng tatlong hindi nakilalang armadong lalaki.
Mabilis namang rumesponde ang mga pulis at inabutan pa nila si Dichoso sa Brgy. Sawanga pero sinalubong umano sila ng putok dahilan ng ilang minutong shootout hanggang sa bumulagta ang nasabing suspek. Nakatakas naman patungo sa hindi malamang direksyon ang dalawa pang suspek.
Nabawi sa napaslang na suspek ang hindi malamang kalibre ng baril.