MANILA, Philippines — Patay ang dalawang matandang magkapatid matapos na makulong ng apoy sa loob ng nasusunog nitong tahanan sa Brgy. Matlang, Isabel, Leyte, kamakalawa.
Kinilala ang mga nasawi na sina Estrelita Centino, 88-anyos at Conegunda Wenceslao, 78; pawang biyuda.
Sa ulat ng Leyte Fire Marshall, nangyari ang sunog bandang alas-11 ng gabi habang mahimbing nang natutulog ang magkapatid na matanda.
Dahil sa kapwa biyuda na ay magkasama ang dalawa na tumira sa bahay pag-aari ng kanilang inang si Alfreda Roble Ramas na namatay may ilang taon na ang nakalilipas. Sila ay nagtatanim ng gulay upang may mapagkukunan ng kanilang kabuhayan.
Nagulantang na lamang ang mga kapitbahay nang makitang nilalamon ng apoy ang buong kabahayan ng magkapatid.
Nabigo namang makalabas ng kanilang tahanan ang dalawang matanda dahil mahina na sila hanggang sa makulong at kasamang lamunin ng apoy.
Pinaniniwalaan na ang natumbang lampara ang pinagmulan ng sunog sa tahanan ng mga biktima.