MANILA, Philippines — Namatay noon din ang isang pulis na dating bodyguard ng isang alkalde matapos tambangan at pagbabarilin ng hinihinalang berdugo sa Brgy. Lapasan, Cagayan de Oro kamakalawa.
Kinilala ang biktima na si Patrolman Roy Aguas, nakatalaga sa Regional Personnel Holding Administration Unit ng Northern Mindanao Police at nagtamo ng limang tama ng bala sa ulo.
Si Aguas ay nagsilbing escort ni David Navarro, ang pinaslang na alkalde ng Clarin, Misamis Occidental.
Sa ulat, kasasakay lang ni Aguas sa kanyang motorsiklo nang pagbabarilin ng ‘di kilalang suspek malapit sa isang vulcanizing shop sa Brgy. Lapasan alas-4:00 ng hapon. Kagagaling lang ng biktima sa duty sa Camp Alagar ng Northern Mindanao Police ang napatay na pulis.
Matapos na mapatay ang pulis, tinangay pa ng mga salarin ang baril ni Aguas.