MILAOR, Camarines Sur, Philippines — Tatlong magkakamag-anak na dalagita ang nasawi matapos na malunod sa baha sa tabi ng boulevard ng Zone-2, Herrera, Brgy. Del Rosario sa bayang ito sa Camarines Sur Huwebes ng hapon.
Patay nang maihaon ng rumespondeng rescue team mula sa LGU-Milaor ang mga biktima na kinilalang sina Joan Cabalquinto, 16-anyos; Quenny Ann Baer, 12-anyos at Nene Cabalquinto, 14-anyos; pawang residente ng nasabing barangay.
Masuwerte namang nakaligtas at isinugod sa Bicol Medical Center sa Naga City ang isa pa nilang kaanak na 13-anyos na dalagita.
Sa ulat, dakong ala-1 ng hapon, magkakahawak kamay ang magpipinsang naglalakad sa bahang boulevard patungong Maharlika Highway.
Gayunman, isa sa kanila ang nadulas at nahulog sa malalim na bahagi ng baha dahilan para lahat sila malunod maliban kay Kaye na agad nakuha ng rumespondeng search and rescue team.