MANILA, Philippines — Nasawi noon din ang isang rider matapos na sumalpok ang minamaneho niyang motorsiklo sa dalawang sasakyan sa Brgy. Pinac-Pinacan sa bayan ng San Rafael, Bulacan kamakalawa.
Sanhi ng matinding pinsalang tinamo sa ulo at katawan, dead-on-the-spot ang biktimang si Angelito Santiago, 21, sewer at residente ng Brgy. Pulong Bayabas sa bayang ding ito.
Kusa namang sumuko sa pulisya saka kaagad na sinampahan ng kaukulang kaso ang suspek na si Samuel Maboloc, 36, driver, ng Brgy. Gavino Maderan sa General Mariano Alvarez, Cavite.
Sa imbestigasyon ni SPO1 Rypson Quirijero dakong alas-5:30 ng hapon ay papalabas ng isang kilalang rice mill ang sasakyang Kia van nang pansamantalang huminto ang Mitsubishi L-300 van (WEO-895) na minamaneho ng suspek upang pagbigyan nito ang lumalabas na sasakyan.
Nagkataon namang matuling binabagtas ng biktima ang naturang kalsada lulan ng motorsiklong Euro 150 na walang plaka na naging dahilan upang masagi ng motorsiklo ang papalabas na Kia van saka tuluyang bumangga sa nakatigil na L-300 van at nagresulta sa kanyang kamatayan.