DASMARIÑAS CITY, Cavite, Philippines — Kalaboso ang 29-anyos na lalaki makaraang ireklamo ng 18-anyos na kolehiyala sa pangmomolestiya sa loob ng shopping mall sa Barangay Molino 3 sa Bacoor City, Cavite kamakalawa ng gabi.
Pormal na kinasuhan ang suspek na si Romnick “Nick” Panganiban, 29, binata, walang trabaho at residente ng Blk 1, Lot 5, Belmant St., Covina Village, Brgy. Buhay na Tubig, Imus City, Cavite.
Sa isinagawang imbestigasyon ng pulisya, alas 8:00 ng gabi ng dalhin sa kanilang himpilan ang suspek ng pamunuan at security guard ng Puregold Supermarket, V- Central Mall matapos nila itong arestuhin hinggil sa reklamong pangmomolestiya ng suspek.
Base sa reklamo, namimili ang biktima sa V-Central Mall nang lapitan ng suspek sa likuran saka ikiniskis nito ng ilang ulit.
Gayunman, biglang napabalikwas ang biktima kaya nagtatakbo ang suspek papalabas ng mall.
Mabilis namang humingi ng tulong sa security guard ang biktima kaya kaagad na nasakote ang suspek saka dinala sa himpilan ng pulisya.