MANILA, Philippines – Kalunus-lunos na kamatayan ang sinapit ng 46-anyos na ina matapos itong pagsasaksakin ng sarili nitong anak na sinasabing lango sa droga sa loob ng kanilang bahay sa Barangay Mabanogbog, Urdaneta City, Pangasinan noong Biyernes ng hapon. Idineklarang patay sa Divine Mercy Hospital ang biktimang si Margie Litaba habang nahaharap naman sa kasong parricide ang nasakoteng suspek na si Salvador Litaba, 25. Sa ulat ng Pangasinan PNP na nakarating sa Camp Crame, naganap ang krimen dakong alas-2:20 ng hapon kung saan nagkaroon ng pagtatalo ang mag-ina matapos na tumanggi ang biktima na bigyan ng pera ang kaniyang suwail na anak bunga ng bisyong shabu. Dito na nagalit ang suspek na kumuha ng patalim sa kusina saka pinagsasaksak ang ina. Rumesponde naman ang pulisya matapos ipaalam ng ilang kapitbahay ang naganap na krimen kaya nasakote ang suspek.