BULACAN, Philippines – Pinabulagta ang 22-anyos na drug peddler matapos itong ratratin ng hindi kilalang lalaki sa Barangay Poblacion, bayan ng Santa Maria, Bulacan kahapon ng madaling araw. Apat na tama ng bala ng baril ang tumapos sa buhay ni Cedrick Macajito ng Sitio Tabing-Ilog sa nasabing barangay. Pinaghahanap naman ang suspek na nakilala lamang sa Alyas Gerry na sinasabing nakabili ng shabu sa biktima. Sa imbestigasyon ni PO3 Joey Cabarles, nilapitan at niratrat ng suspek ang biktima habang nakatayo sa harap ng drug store. Nabatid sa kaibigan ng biktima na bago naganap ang pamamaslang ay bumili ng shabu ang suspek subalit hindi ibinigay nito ang P800 sukli. Dito na nagalit ang suspek at isinagawa ang pamamaslang habang narekober naman sa crime scene ang apat na basyo ng bala ang cal. 9mm pistol.