CAVITE, Philippines – Tatlo-katao kabilang ang 3-anyos na totoy ang namatay habang apat naman ang nasugatan makaraang sumalpok ang isang SUV sa kasalubong na van sa kahabaan ng Daanghari Road sa Barangay Molino 4, Bacoor City, Cavite kamakalawa ng hapon.
Kinilala ang mga biktima na sina Francisco Mabuhay Aninon Jr., driver ng van, ng Block 6 Lot 16 Phase 3 Mabuhay Homes Subd. sa Dasmariñas City, Cavite; Choe Mc Enzie Abcede, 3; at ang yaya nito na si Brenda Diolon, 22, kapwa pasahero ng Innova SUV.
Sugatan naman sina Nestor Partigosa, Elizabeth Ortigosa, mga sakay ng van; Mark Abcede , 35, driver ng SUV; at si Rochelle Abcede, 33, pasahero naman ng SUV.
Sa policed report na isinumite sa Camp Pantaleon Garcia sa Imus City, sumabog ang gulong sa kaliwang unahan ng Innova (AAY 6290) na minamaneho ni Mark kaya nawalan ito ng control sa manibela saka bumaliktad.
Gayon pa man sumalpok ang Innova SUV sa kasalubong na van (REX 929) na minamaneho ni Aninon Jr.
Sumaklolo naman ang ilang residente kung saan ilang oras din nailabas sa dalawang sasakyan ang mga biktima.