MANILA, Philippines – Dahil sa pandidiri ng mga tao sa kaniyang paligid bunga ng grabeng sakit sa balat, nag-suicide ang 24-anyos na binata matapos itong magbigti sa kanilang bahay sa Barangay Lodlod, Lipa City sa Batangas noong Biyernes ng hapon. Sa ulat ng Batangas PNP na isinumite sa Camp Crame, dakong alas-3 ng hapon nang magpatiwakal ang biktimang si Jose Lanete Jr., tubong Pinamalayan, Oriental Mindoro at pansamantalang naninirahan sa nasabing lugar. Lumilitaw naman sa imbestigasyon na labis na dinamdam ng biktima ang ipinakitang pandidiri ng mga tao kabilang ang kaniyang mga kaibigan na nilalayuan ito. Nadiskubre ng kapatid nitong si Angel Lanete ang pagpapatiwakal ng biktima matapos itong umuwi at hanapin ang kapatid.