NORTH COTABATO, Philippines – Tatlo-katao na sinasabing notoryus drug peddler ang napatay makaraang manlaban sa mga operatiba ng pulisya habang isinisilbi ang search warrant kahapon ng madaling araw sa General Santos City. Kinilala ni P/Supt. Maximo Sebastian ng Regional Special Investigation Detection Team-12 ang tatlo na sina Jun Hassim, Suma Sultan, 33, mga nakatira sa Purok Islam, Barangay South; at isa pang hindi nakilalang lalaki. Naisugod naman sa Dr. George Royeca Memorial Hospital ang tatlo subalit idineklarang patay. Ayon kay Sebastian, sabay-sabay na pinasok ng kanyang tropa ang walong bahay subalit nagkaroon nang shootout sa tatlong bahay at bumulagta ang tatlo. Umabot sa 10-katao naman ang dinala sa Camp Lera habang nagpatuloy pa ang search operation sa inilatag na “Lambat Sibat” operations ng pulisya. Narekober ang tatlong baril at mga drug paraphernalia.