ARITAO, Nueva Vizcaya, Philippines – Hindi na umabot ng buhay sa ospital ang isang caretaker ng farm nang ito ay barilin ng suspek matapos hindi makabili ng alak sa Barangay Darapidap ng bayang ito kamakawala ng madaling araw.
Ang nasawi ay kinilalang si Teofilo Coyos, caretaker ng Jomar-Quezon farm na matatagpuan sa Sitio Saranay. Habang ang suspek ay nakilalang si William Lim-ang, 51, at residente ng San Antonio North,Bambang, Nueva Vizcaya.
Batay sa imbestigasyon ng Aritao PNP, dakong ala-1:00 ng madaling araw nang utusan ng suspek ang biktima kasama ang isang 17-anyos na nakilalang si Satur Alga para bumili ng alak na inumin.
Dahil umano sa alanganin na ang oras ay bumalik ang dalawa na walang nabiling alak na ikinagalit ng suspek.
Pinaalis ng suspek si Alga at ilang sandali ay pinagbabaril ng una ang biktima.
Agad na nadakip ang suspek na kasalukuyan ngayong nakapiit sa Aritao PNP.