MANILA, Philippines – Pinabulagta ang isang negosyante na kandidatong konsehal ng Liberal Party (LP) matapos itong pagbabarilin ng motorcycle-riding gunmen sa kanilang bahay sa Barangay Poblacion Uno sa bayan ng Bansalan, Davao del Sur noong Miyerkules ng gabi.
Napuruhan sa kaliwang bahagi ng mukha at likuran ang biktimang si Domingo Isip habang nakaligtas naman ang driver nitong si Joel Caballero na nakasaksi sa krimen.
Base sa police report na isinumite sa Camp Crame, naitala ang krimen dakong alas-10:45 ng gabi habang papasok ang biktima sa compound ng kanilang bahay sa nabanggit na barangay.
Nabatid na kagagaling lamang sa sabungan ang biktima kasama ang driver nito nang nakasalubong si kamatayan.
Sunud-sunod na putok ang umalingawngaw kung saan duguang bumulagta ang biktima habang tumakas naman ang gunman na sumakay sa naghihintay na motorsiklo na minaneho ng hindi rin kilalang lalaki.
Kabilang sa anggulong sinisilip ng mga awtoridad ay pulitika at alitan sa negosyo ang isa sa motibo sa pamamaslang.