NORTH COTABATO, Philippines – Pinaniniwalaang onsehan sa droga ang isa sa motibo kaya napatay ang 39-anyos na negosyante matapos itong ratratin ng dalawang hindi kilalang lalaki sa loob mismo ng sariling bahay sa Purok Quezon, Barangay Kipalbig sa bayan ng Tampakan, South Cotabato kamakalawa ng hapon.
Kinilala ni SPO3 Elmer Cagas ang biktimang napuruhan sa ulo na si Cristopher “King” Vilbar alyas King, may asawa at bumibili at nagbebenta ng sasakyan.
Ayon sa anak na babae, kaagad siyang umuwi makaraang mabatid mula sa kanilang mga kapitbahay na may dalawang lalaking pumunta sa kanilang compound at nakarinig ng mga putok ng baril.
Naabutan pa ng anak ng biktima na papalabas ang mga suspek sa kanilang compound subalit hindi niya nakilala ang mga ito.
Sinisilip ng pulisya ang anggulong may kaugnayan sa bentahan ng droga ang motibo sa nasabing krimen.
Narekober sa crime scene ang walong basyo ng bala ng cal. 45 pistol at 2-plastic sachet ng shabu sa bulsa ng biktima.