NORTH COTABATO, Philippines – Napatay ang 15-anyos na Grade 9 student matapos itong pagbabarilin ng motorcycle-riding gunmen sa harap ng Notre Dame High School sa bayan ng Parang, Maguindanao kahapon ng tanghali.
Napuruhan sa dibdib, tiyan at ulo ang biktimang si Mucsir Macapeges, Grade 9 student sa nasabing eskuwelahan ng Notre Dame at nakatira sa nabanggit na bayan.
Sa police report na isinumite kay Maguindanao PNP director P/Senior Supt. Nickson Muksan, palabas nang school ang biktima nang lapitan at pagbabarilin ng dalawang hindi kilalang lalaki.
Dahil sa takot na naramdaman ng mga estudyante at guro, kaagad na sinuspinde ang klase sa paaralan.
Nangangalap pa ng impormasyon ang pulisya kaugnay sa motibo ng gunman sa pagpaslang sa biktima.