TUGUEGARAO CITY, Cagayan, Philippines – Pinabulagta ang 32-anyos na suspek sa kasong kriminal matapos itong pagbabarilin ng hindi kilalang lalaki sa harapan mismo ng kanyang nanay sa Barangay Bulbulala, bayan ng Balaoan, La Union kamakalawa. Sa police report na nakarating kay P/Senior Insp. Rodelio Olsim, hepe ng Balaoan PNP, kasama ng biktimang si George Navidad ang kanyang nanay na si Julita Navidad mula sa money shop nang hintuan ng naka-motorsiklong lalaki at barilin sa likurang ulo ang biktima. Tumagos ang bala ng cal.45 pistol sa noo ng biktima at binalikan pa ng gunman para ratratin ng ilang beses para masigurong narupuhan na ito. Narekober sa biktima ang belt bag na may cal. 45 pistol. Sinabi ni PO3 Rodrigo Lopez na pansamantalang nakalaya si Navidad sa kasong attempted murder at illegal possesion of firearms na dinidinig pa sa korte matapos itong makapagpiyansa.