NUEVA ECIJA, Philippines – Pinagbabaril ng dalawang hindi pa kilalang salarin ang isang 21-anyos na binata habang nanonood ng isang basketball games sa covered court sa kanilang lugar sa Purok 5, Barangay Sta. Barbara, San Antonio ng nasabing bayan noong Huwebes ng hapon.
Ang biktima na idineklarang dead-on-arrival sa KC1 Emergency Hospital sa Barangay San Francisco dahil sa tama ng bala sa leeg ay kinilalang si Leonard Pascual, drayber at nakatira sa nasabing lugar.
Batay sa ulat, bandang alas-5:00 ng hapon ay nanonood ng basketball ang biktima nang dumating ang dalawang lalaki na sakay ng motorsiklo na nagkunwaring manonood din ng basketball.
Nang makita ng mga ito ang biktima ay nilapitan ito at binaril at bumagsak at saka tumakas ang mga suspek sakay ng kanilang motorsiklo patungong sa Barangay Batitang.
Patuloy ang imbestigasyon kung may nakaaway ang biktima kaya’t ito ay niresbakan.