TUGUEGARAO CITY, Philippines – Patay ang dalawang bata, isa rito ay gra-graduate sana ng elementarya habang kritikal ang lima pa matapos silang tumilapon sa sinasakyang tricycle na nabangga ng isang humahagibis na kotse sa highway ng Brgy. Calayan, Gonzaga, Cagayan kamakalawa.
?Kinilala ni SPO4 Renato Flores ang mga namatay na sina Kae-kae Agno, 5 at Justin Clark Agno,12 na magtatapos sana sa elementarya at anak ng driver ng trike na si Roel Agno.?
Samantalang sugatan namang isinugod sa pagamutan ang magpipinsang paslit na sina Maribel, Marvel, Virgilio, Natalie at ang driver na si Roel.?
Lumalabas sa imbestigasyon na pauwi na ang mga biktima sa kanilang tahanan sa Brgy. Batangan nang tumbukin sila mula sa likuran ng sumusunod na Toyota Vios na minamaneho ni Gilbert Campano, 48 anyos na driver ni Konsehal Hermogenes Baclig Jr. dakong alas-7:30 ng gabi.?
Sa lakas ng pagkakabangga ay tumilapon ang mga biktima sa palayan habang agad naaresto ng mga nagrespondeng mga operatiba ng pulisya si Campano na nabatid na nasa impluwensya ng alak. (Raymund Catindig)