NORTH COTABATO, Philippines – Pinabulagta ang 33-anyos na school principal matapos itong pagbabarilin ng riding-in-tandem assassins sa bisinidad ng Rosales Street, Barangay Rosary Heights 7, Cotabato City, Maguindanao kamakalawa ng gabi. Kinilala ni P/Senior Insp. Reynaldo Delantin ang biktima na si Abdila Bautista Ibra, principal sa pribadong eskuwelahan ng Albert Einstein Elementary at High School sa nasabing lungsod. Ayon kay Delantin, papauwi na ang biktimang lulan ng kanyang itim na SUV na may plakang YFD 960 nang pagbabarilin ng tandem gunmen. Napuruhan sa tagiliran ng katawan na tumagos naman sa kanyang puso kung saan naisugod pa ito sa Cotabato Regional and Medical Center subalit idineklarang patay.